म भर्खरकी सुत्केरी आमा

प्रकृतिले सिंगारिएकी,सुन्दरताकी धनी अनि सौंन्दर्यकी खानी हुँ म।छातीभरी लालुपाते र गुराँस फुलाएर, नशा-नशामा संगितमय झर्ना छाँगा बगाउँदै, मण्डपमा सजिएकी बेहुली सरह सधैँ, दुनियाँको आँखामा बसी रहने रानी हुँ म! गरिनँ मैले बिहेको सम्झौता कसैसँग, प्रस्ताब आथ्यो धेरैको, हस्ताक्षर गरिनँ। किनकी म आमा भईसकेकी छु, समयको माग र परिवेश सँगै गर्भिणी हुन सक्ने, एक प्राकृतिक आमा, तर अबिवाहिता आमा!
बरु भोक, शोक र सन्तपमा पनि कुनै बिचलित नभई,समयको माग र परिबेशको गर्भाधारण गरिरहेको छु मैले,तर आफ्नो स्वार्थको लागि ईज्जत भने बेचिनँ कहिल्यै।न त स्वाभिमान र मर्यादालाई कुल्चेर, अस्मितामा कुनै पराईलाई नै पल्काएँ मैले, तर पनि स्वदेशी तथा बिदेशी नराधमहरुबाट भने,अनेक यातना र सास्तीहरु खेपिरहेँ मैले।कत्तिले मेरा अंग अंग मुसार्न चाहे,कत्तिले मेरा ईज्जतहरुमा आँखा गाडे, बिदेशी ब्वाँसाहरुको आडमा कत्ति खेप त,आफ्नै सन्ततीहरुले मेरा छातीभरी बुर्कुसी खेले, तरपनि मैले कुनै बिचलित नभई, नयाँ शैलीका परिवर्तन र व्यायामहरु जन्माई रहेँ मैले! किनकी म आमा भईसकेकी छु,समयको माग र परिवेश सँगै गर्भिणी हुन सक्ने, एक प्राकृतिक आमा, तर अबिवाहिता आमा!
बिभूतिहरुमा अमरसिंह बलभद्र जस्ता वीर पुरुषहरु अनि,बुद्ध जस्ता शान्तिको दुत र भृकुटी र सीता हरु मैले नै जन्माएँ । राजतन्त्र भनौं या त जनतन्त्र, यी सबै मेरा पैदावारीस हुन् जे भएपनि मौलिकताका कहिल्यै हनन् गरिनँ मैले, अनि राजनीतिक पथको कयौं युद्धहरुमा चेपिएर पनि कहिल्यै गर्भ तुहाईनँ मैले,किनकी म आमा भईसकेकी छु,समयको माग र परिवेश सँगै गर्भिणी हुन सक्ने, एक प्राकृतिक आमा, तर अबिवाहिता आमा!
तर धेरै समय देखि मेरो कोखमा असहजता आएको छ, मेरा आफ्नै सन्ततिको भातृ कलहले,मेरो कोख रित्तिदैछन्, छाती थुनेलो हुँदैछन्, तरपनि म कत्ति पनि बिचलित नभई गर्भाधारण भईरहेकी छु, समयको माग र परिवेशको मध्यनजर राख्दै, यसपटक पनि मैले नयाँ लोकतन्त्र जन्माएकी छु।तर म प्रसब पिंडामा पटक्कै छट्पटाईनँ, बरु प्रसब पिंडाको आलो घाऊ सहेर भएपनि, नयाँ गीत गाएर, आँफै नाचेकी छु, रमाएकी छु! समयको माग र जनादेशको गर्भाधारण गर्दै मैले, नयाँ नेपाल जन्माएकी छु!त्यसैले म महान् आमा, करोडौंकी नेपाल आमा! तर अबिवाहिता आमा! नयाँ नेपालको नयाँ संबिधान जन्माएकी, भर्खरकी सुत्केरी आमा!!